3 iyul 2008
ABŞ-ın NED Milli Demokratiya Fondunun Avropa və Avrasiya üzrə Baş Direktoru Nadiya Diyuk “Women’s Media Watch” Azərbaycan Qadın Jurnalistlər Birliyinin nümayəndələri ilə görüşüb. Birliyin sədri Sevinc Osmanqızı təşkilatın Azərbaycan mətbuatında etik jurnalistika prinsiplərinin möhkəmlənməsi, mətbuat azadlığı və qadınların cəmiyyətə inteqrasiyası sahəsində gördüyü işlər barədə məlumat verib. Xanım Nadiya Diyuk Bakıya səfərinin işgüzar xarakter daşıdığını və son səfərindən keçən 4-5 il ərzində baş verən dəyişikliklərlə tanış olmaq məqsədi güddüyünü deyib. “NED-in baş qərargahı Vaşinqtonda yerləşir. Əməkdaşlarımız ildə 3-4 dəfə birgə layihələr həyata keçirdiyimiz ölkələrə səfərlər edərək, yerlərdə demokratiyanın vəziyyəti ilə tanış olurlar”. Qonaq Bakının xeyli dəyişdiyini, “təmizləndiyini, xeyli bahalı maşının peyda olduğunu və yollarda tıxacların yarandığını” müşahidə etdiyini söyləyib.
“Azərbaycanda demokratiya ilə bağlı vəziyyəti necə dəyərləndirirsiniz?” sualına cavabında Baş Direktor mətbuat azadlığı və sərbəst toplaşmaq sahəsində problemlər olduğunu qeyd edib: “Bir neçə il bundan əvvəl Bakıya gələndə burada söz azadlığı ilə bağlı vəziyyət daha yaxşı idi. Jurnalistlərə qarşı zor tətbiq olunmurdu. Sərbəst toplaşma barədə qəbul olunan yeni qanunlar da düzgün istiqamətdə deyil. Bir çox siyasi partiyanın şəhərin mərkəzində qərarqahının olmaması da diqqətimi çəkdi. Partiya rəhbərlərindən birinin isə passportu əlindən alınıb. Bunlar demokratik prinsiplərə ziddir.”
Azərbaycanın gələcək inkişaf perspektivlərindən danışarkən, qonaq ölkənin intellektual potensialına inandığını və mövcud problemlərin müvəqqəti olduğuna inandığını deyib: “Azərbaycanda kifayət qədər yüksəl təhsilli adam var. Bakı hələ 19-cü əsrdə öz inkişaf səviyyəsi, mədəniyyət və ədəbiyyatı ilə tanınıb. Bu, Azərbaycanlıların şüuru və genlərindədir. Sadəcə, demokratik fikirləri ifadə etmək üçün kifayət qədər imkan yoxdur. Hökümətlə cəmiyyətin funksiyaları dəqiq müəyyənləşdirilməlidir. Hökümət cəmiyyətdə insan haqqlarına hörmət olunmasını təmin etməlidir. Vətəndaş cəmiyyəti isə siyasətçiləri ictimaiyyət qarşısında cavabdeh saxlaya bilməlidir.”
NED 1983-cü ildə Ronald Reyqanın presidentliyi dövründə dünyada demokratik institutların güclənməsinə yardım məqsədilə yaradılıb. Qurum müstəqil, bitərəf Direktorlar Şurası tərəfindən idarə olunur. ABŞ Konqresindən ayrılmalar hesabına maliyyələşən NED Azərbaycan da daxil olmaqla MDB, Orta və Şərqi Avropa, Latın Amerikası, Yaxın Şərq və Afrika ölkələrində demokratiyanın inkişafına yardım edən layihələrə dəstək verir.
