Elə bilərsiz mən də özünü təmizə çixaran bəzi kişilər kimi ”Yüyrək at özünə qamçı vurdurmaz” düşünürəm. Xeyr,sadəcə fikirləşirəm ki,biz öz kişilərimizi sevdiyimiz kimi, onların bəzən əl atdığı “gücə”, əslində isə gücsüzlüyünü göstərən zorbazorluğa aşiqik!
“Sevənin ağlı olmaz” deyirlər. Etiraf edək ki,bu vəziyyət, döyülüb-söyülmək, alçalmaq, kişilərimiz dura-dura, ailəni dolandırmaq bizi xoşbəxt etməsə də, qane edir. Niyə də yox ? Qane etməsə, bu qədər zorakılıqa qatlanardıqmı? Ana olacağımız üçün təhqir olunardıqmı? Dəfələrlə aldadıldıqdan sonra kişi təfəkküründə heç də cinsi zorakılıq kimi qəbul olunmayan cinsi münasibətlərə məcbur edilərdikmi? “Ailənin işinə qarışmazlar” deyib kənara çəkilərdikmi? “Birdən adımız ləkələnər” deyə, olanları udardıqmı? “Məişət zəminində” öldürülərdikmi?
Yadımdadır, Milli Məclisin payız sessiyasında “Məişət zorakılığının qarşısının alınması haqqında” qanun layihəsinin müzakirəsi gedirdi. Azərbaycanda qeydə alınan zorakılıq hallarının sayını məni dəhşətə gətirdi. Bu, hələ özündə cəsarət tapıb, kömək üçün müraciət edənlərin sayı idi. Bəs nə qədərimiz döyüldüyümüzü ört-basdır edib?
Məişət zəminində 73 qadının qətlə yetirildiyini eşidəndə, onların yetim qalan, günahsız balalarını düşündüm. Ailə dəyərlərimizin get-gedə yuvarlandığı hala acıdım. Özümüzə, biz qadınlara əsəbiləşdim – bunun üçünmü dözürük? Nədir bu, yumruq sevdası?
Bilirəm, bəziləri razılaşmayacaq, “döyürsə, sevir” deyəcək. Lazım deyil,siz Allah, heç olmasa bunu etməyin. Heç olmazsa, o söydüyünüz və döydüyünüz qadınları rahat buraxın. Sizin üçün hətta ölümə də hazır olduqlarını anlayın və bir qadın kimi olmasa da, insan kimi sevin. Tanrı bu sevgi payından heç kimi məhrum etməyib axı. Yox, əgər qəbul etmirsizsə, onda yumruqla saxladığınız “məhəbbətinizi” etinasızlığla əvəz edin. Boş verin, biz çarəmizə baxarıq, hətta tək qalmaqdırsa qismətimiz, zorakı sevdadan vaz keçərik. Öz həyatımızın, valideynlərimizin, balalarımızın, gələcəyimizin qayğısına qalarıq. Bəsdir, qurtulun bu həvəsdən. Bizi də sizə və sizin “sillənizə”dözmək məcburiyyətindən, bu zorakı sevdadan xilas edin.
Sevda Güləhmədova
