19 NOYABR 2007 – Cİ İL TARİXİNDƏ
« TƏBİİ DOĞUŞ QEYSƏRİYYƏ ƏMƏLİYYATİNA QARŞI»
KAMPANİYASINA START VERİLDİ
Kampaniyanın təşəbbüskarı olan «W M W» Azərbaycan Qadın Jurnalistlər Birliyinin sədri Sevinc Osmanqızı son zamanlar cərrahi müdaxilə yolu ilə ana olmaq istəyən qadınların sayının artması tendensiyasının mövcudluğunu vurğulayaraq, bu haqda əksər qadınların məlumatsız olduğunu bildirdi. Belə ki, 3 ay davam edəcək kampaniya da məhz maarifləndirici xarakter daşıyaraq, bu boşluğu müəyyən qədər doldurmalıdır.
Birliyin üzvü İlhamə Novruzova ÜST-nın ekspertlərinin fikrincə, qeysəriyyə əməliyyatlarının təbii doğuşa nisbətinin 15 faizi aşmaması ilə bağlı tövsiyəsinin olduğunu xatırlatdı. Azərbaycanda bu sahədə rəsmi göstəricinin 13 faiz olduğu açıqlansa da, İ. Novruzova bu rəqəmin mübahiəsi olması fikrindədir. Onun fikrincə, qadın məsləhətxanalarında, xəstəxanalarda qadına qeysəriyyə əməliyyatlarının təsirilə bağlı istər şifahi məlumat verilməsi, istərsə də yazılı formada xatırlatma bukletlərinin paylanması zəruridir.
Bakı şəhərinin baş mama - ginekoloqu Zemfira Topçubaşova da qeysəriyyə əməliyyatlarının sayınını artması ilə bağlı həyəcan təbili çalmağın zamanının yetişdiyini bildirdi. Təcrübəli həkim hesab edir ki, əgər qadınlar qeysəriyyə əməliyyatı zamanı və sonra cərrahi müdaxilənin doğurduğu mümkün fəsadlar, onun ananın və uşağın orqanizminə təsiri haqda məlumata malik olsa idilər, belə vəziyyət yaranmazdı.
«W M W» Azərbaycan Qadın Jurnalistlər Birliyinin üzvü İlhamiyyə Rzayeva belə sual qoydu: gələcək ana sesimində yalnız öz təşəbbüsünə arxalanmaq hüququna malikdir ya burada yeganə meyar mütəxəssis rəyi olmalıdır? Müvafiq qanunvericilik qadının tibbi müəssisəyə gələrək, «Mən əməliyyat yolu ilə uşaq dünyaya gətirmək istəyirəm» seçiminə haqq qazandırırmı? Ümumiyyətlə, əməliyyatların sayının artması yalnız qadınların özləri üçün daha asan və ağrısız doğuş imkanı aramasından irəli gəlir ya başqa səbəblər var? «W M W» Azərbaycan Qadın Jurnalistlər Birliyinin üzvü Sevinc Telmanqızının ölkə xəstəxanalarında təbii doğuş və qeysəriyyə əməliyyatlarının qiymətilə bağlı açıqladığı rəqəmlər də bu baxımdan maraq doğurdu.
Kampaniyanı dəstəkləyən isveçrəli həkim Süzen Ras və amerikalı tibb bacısı Emi Nyubay qeysəriyyə əməliyyatı və təbii doğuş probleminin əcnəbi ölkələrin praktikasında özünü necə təzahür etməsi haqda danışdılar.
Sonda Sevinc Osmanqızı 3 aylıq kampaniyanın gedişatına dair məlumatı açıqladı.
ƏZİZ XANIMLAR
HAMINIZI « TƏBİİ DOĞUŞ QEYSƏRİYYƏ ƏMƏLİYYATİNA QARŞI»
KAMPANİYASINDA FƏAL İŞTİRAK ETMƏYƏ DƏVƏT EDİRİK.
