1 avqust, 2008
"Women's Media Watch" Azərbaycan qadın jurnalistlər birliyi (AQJB) President İlham Əliyevin "Azərbaycan Respublikasında kütləvi informasiya vasitələrinin inkişafına dövlət dəstəyi Konsepsiyası" və "Azərbaycan Respublikası kütləvi informasiya vasitələrinə birdəfəlik maliyyə yardımı haqqında" imzaladığı sənədləri salamlayır.
Mətbuat ictimaiyyətinin iştirakı ilə hazırlanan Dövlət dəstəyinə dair Konsepsiya 1-ci hakimiyyətlə 4-cü hakimiyyət arasında işbirliyinin müsbət nümunəsidir. Gender, uşaq və gənclərin tərbiyəsi, vətənpərvərlik, milli kimliyin aşılanması, vətəndaş cəmiyyəti, hüquqi dövlət kimi gündəlik ictimai diqqətdən kənarda qalan məsələlərdə proqram və layihələrin, jurnalist araşdırmalarının dəstəklənməsi müsbət haldır. Azərbaycan Qadın Jurnalistlər Birliyi ümid edir ki, Konsepsiyadan irəli gələn İş planı Azərbaycanda müstəqil mətbuatın inkişafı üçün vacib olan reklam bazarı, vergi imtiyazları, peşəkar jurnalist təhsilinə şərait yaradacaqdır. Effektiv İş planı Dövlət Konsepsiyanın uğuru üçün müstəsna əhəmiyyətə malik olacaqdır.
"Birdəfəlik yardım göstərilməsi haqqında" President sərəncamında siyasi təmayülündən asılı olmayaraq, Azərbaycanın əsas qəzet və xəbər agentliklərinın, o cümlədən hakimiyyətin tənqidi ilə fərqlənən mətbuat orqanlarının yer alması sevindirici haldır. Bu, Azərbaycan mətbuatının inkişafına qayğının təcəssümü və ölkədə plüralizmə dəstəyin təqdirəlayiq nümunəsidir. Dövlət konsepsiyası əsasında yaradılacaq Mətbuata dəstək Fonduna da eyni prinsipləri rəhbər tutmağı arzulayırıq.
